СЕЛЕКТИВНА ПРАВДА Е НЕПРАВДА!
02.05.2017 година
Граѓанската опција за Македонија – ГРОМ вечерва одржа седница на Извршниот одбор и ја разгледа политичко безбедносната состојба во Република Македонија. Истата беше оценета како многу сложена и тензична. Членовите на Извршниот одбор оценуваат дека двегодишното политичко насилство од политичарите врз граѓаните, на 27 април се претвори во физичко насилство од народот врз политичарите.
Ова е уште една потврда дека политичарите мора сериозно да размислат околу тоа колку говорот на омраза влијае врз подгревање на страстите кај одделни граѓани.
Физичкото насилство не го одобруваме и мора да има правна одговорност. Но, да се бара кривична одговорност само од народот, а не и од инспираторите значи да се „удира“ по последиците, но не и по причините.
Одговорност мора да поносат сите: одделни лидери на партии, граѓани и пратеници.
ГРОМ бара:
- Кривична одговорност за пратеникот кој пееше химна на друга држава во македонскиот парламент.
- Кривична дговорност за лидерот на партијата кој на прес конференција самиот изјави дека тој имал сценарио.
- ГРОМ бара кривична одговорност за извршителите на сценариото кои грубо го прекршија Уставот и Деловникот за работа на Собранието.
- Кривична одговорност за телохранителот кој испука два куршуми меѓу гневните граѓани и држеше вперен пиштол во истите.
Значи одговорност – за сите! И тоа без исклучок.
Барање одговорност само од одделни граѓани кои учествуваа во тепачката во Парламентот, а не и од иницијаторите на инцидентот, е делење селективна правда, а селективната правда е неправда!
ГРОМ сака уште еднаш да укаже дека не е добро да се потцени народот и за лошите политики на политичарите не може само тој да сноси одговорност. Во моментов народот е шокиран од случувањата на 27 април и потоа, и ако натаму се продолжи со занемарување и потценување од страна на парламентарното мнозинство, охрабрени од одделни амбасади, гневот ќе се врати како бумеранг. Се плашиме дека новиот бран на гневен народ ќе биде многу посилен и надвор од било каква политичка контрола, што е многу опасно за Република Македонија, а тоа е вовед во граѓанска војна.
Затоа, ГРОМ предупредува дека секој политички чекор и натамошно кршење на Уставот на Република Македонија ќе не воведе во нови конфронтации и оттаму мора да се седне и да се најде решение што ќе ги смири страстите без да има победници и поразени.